"Arsenal" yarim himoyachisi Mikel Merino jamoaning yosh iqtidori Maks Doumanni "Barselona" yulduzi Lamin Yamalga qiyosladi.

Ispaniyalik futbolchining fikricha, ikki yosh o‘yinchi katta sahna va yuqori bosimdan qo‘rqmasligi bilan bir-biriga o‘xshaydi.

"Ular e’tibor markazida bo‘lishdan qo‘rqmaydi. Bosim eng yuqori bo‘lgan paytda ham o‘zini yaxshi his qiladi, har doim chaqiriqqa tayyor va umuman tortinmaydi. Hatto eng mashhur futbolchilarga qarshi ham. Shu jihatdan ular juda o‘xshash", — dedi Merino Sky Sports nashriga.

Merino Doumanning tez o‘sib borayotganiga qaramay, kamtarligini ham alohida ta’kidladi.

"Ular o‘ziga xos iqtidorlar, ammo shu bilan birga juda kamtar. Doimo o‘rganishga tayyor va tajribali futbolchilarni tinglaydi. Bu juda katta qadriyat", — dedi u.

Shuningdek, Merino "Arsenal" yosh futbolchining rivojlanishiga ehtiyotkorlik bilan yondashishi kerakligini ta’kidladi.

"Biz uni asrashimiz kerak. Shu bilan birga, uni yanada rivojlanishga undashda davom etishimiz lozim", — dedi Merino.