"Арсенал" ярим ҳимоячиси Микель Мерино жамоанинг ёш иқтидори Макс Доуманни "Барселона" юлдузи Ламин Ямалга қиёслади.
Испаниялик футболчининг фикрича, икки ёш ўйинчи катта саҳна ва юқори босимдан қўрқмаслиги билан бир-бирига ўхшайди.
"Улар эътибор марказида бўлишдан қўрқмайди. Босим энг юқори бўлган пайтда ҳам ўзини яхши ҳис қилади, ҳар доим чақириққа тайёр ва умуман тортинмайди. Ҳатто энг машҳур футболчиларга қарши ҳам. Шу жиҳатдан улар жуда ўхшаш", — деди Мерино Sky Sports нашрига.
Мерино Доуманнинг тез ўсиб бораётганига қарамай, камтарлигини ҳам алоҳида таъкидлади.
"Улар ўзига хос иқтидорлар, аммо шу билан бирга жуда камтар. Доимо ўрганишга тайёр ва тажрибали футболчиларни тинглайди. Бу жуда катта қадрият", — деди у.
Шунингдек, Мерино "Арсенал" ёш футболчининг ривожланишига эҳтиёткорлик билан ёндашиши кераклигини таъкидлади.
"Биз уни асрашимиз керак. Шу билан бирга, уни янада ривожланишга ундашда давом этишимиз лозим", — деди Мерино.
