«Arsenal» bosh murabbiyi Mikel Arteta klub bilan shartnomasini yana uzaytirishi mumkinligi haqidagi savolga javob berdi.
Ispaniyalik mutaxassisdan ikki yil avval bo‘lgani kabi, terma jamoalar o‘yinlari munosabati bilan kuzgi tanaffus vaqtida yangi kelishuv imzolanishi mumkinmi, deb so‘raldi.
«Menimcha, bu masalada barchamiz bir fikrdamiz. To‘g‘ri vaqt kelganda, barchasini rasmiylashtiramiz. Bu yerda xavotirlanishga hech qanday asos yo‘q.
Muddatlar avvalgidek bo‘ladimi-yo‘qmi, bilmayman. Klub bilan ambisiyalarimiz va maqsadlarimiz bir xil. Vaqtimiz bo‘lganida, bu masalani hal qilamiz», — dedi Arteta matbuot anjumanida.
19 sentyabr, shanba kuni «Arsenal» Angliya Premyer-ligasi doirasida safarda «Brayton»ga qarshi maydonga tushadi.
