"Barselona" bosh murabbiyi Xans-Diter Flik jamoa sardori Rafinya Diasning nafaqat o‘yini, balki liderlik fazilatlaridan ham mamnun ekanini bildirdi.
29 yoshli braziliyalik futbolchi ketma-ket ikkinchi o‘yinda xet-trik qayd etdi. Bu safar u "Sevilya" darvozasiga uchta gol urib, jamoasiga 3:1 hisobidagi g‘alabani keltirdi.
"Rafinyadan yaxshiroq sardorni tasavvur qilish qiyin. U biz ega bo‘lishimiz mumkin bo‘lgan eng yaxshi sardor", — dedi Flik uchrashuvdan keyingi intervyuda.
Nemis mutaxassisi Rafinyaning o‘zi uchun odatiy bo‘lmagan markaziy hujumchi pozisiyasida o‘ynayotgani haqida ham to‘xtaldi.
"Rafinyani "to‘qqizlik" pozisiyasiga o‘tkazish — u bilan suhbatlashgandan keyin qabul qilgan qarorim. Bu masalani oldindan muhokama qilgan edik. Biz uning sifatlarini yaxshi bilamiz va u uchun xursandmiz. U to‘p bilan ham, to‘psiz ham juda yaxshi harakat qiladi", — dedi Flik.
Rafinya La Liga to‘purarlari poygasida 12 ta gol bilan peshqadamlik qilmoqda. Lamin Yamal va Kilian Mbappe esa 7 tadan gol urgan.
