«Monako» yarim himoyachisi Lamin Kamara joriy mavsum oxirigacha klubda qolishi mumkin. Bu haqda CaughtOffside xabar berdi.
Manba ma’lumotiga ko‘ra, Kamarani sotib olishga qiziqish bildirayotgan «Liverpul» futbolchi bilan yanvarda amalga oshishi mumkin bo‘lgan transfer yuzasidan dastlabki muzokaralarni o‘tkazgan.
Biroq «Monako» Kamarani kamida kelasi yozgacha jamoada saqlab qolishga umid qilmoqda. Klubda futbolchining transfer qiymati tez sur’atda oshib borishi va unga qiziquvchi jamoalar soni yanada ko‘payishiga ishonishmoqda.
Joriy mavsumda 22 yoshli Kamara barcha musobaqalar hisobida 7 ta uchrashuvda maydonga tushib, 1 ta gol urdi va 1 ta golli uzatma amalga oshirdi.
