«Монако» ярим ҳимоячиси Ламин Камара жорий мавсум охиригача клубда қолиши мумкин. Бу ҳақда CaughtOffside хабар берди.

Манба маълумотига кўра, Камарани сотиб олишга қизиқиш билдираётган «Ливерпуль» футболчи билан январда амалга ошиши мумкин бўлган трансфер юзасидан дастлабки музокараларни ўтказган.

Бироқ «Монако» Камарани камида келаси ёзгача жамоада сақлаб қолишга умид қилмоқда. Клубда футболчининг трансфер қиймати тез суръатда ошиб бориши ва унга қизиқувчи жамоалар сони янада кўпайишига ишонишмоқда.

Жорий мавсумда 22 ёшли Камара барча мусобақалар ҳисобида 7 та учрашувда майдонга тушиб, 1 та гол урди ва 1 та голли узатма амалга оширди.