«Barselona» «Kamp Nou» rekonstruksiyasi sababli yana vaqtinchalik uy stadionini o‘zgartiradi.
Kataloniyaliklar 2027/28 yilgi mavsumni Lyuis Kompanis nomidagi Olimpiya stadionida boshlashadi, deb xabar beradi ESPN. Ko‘chib o‘tish qayta tiklanayotgan arenaga tom o‘rnatish uchun zarur. Jamoa joriy mavsumni «Kamp Nou»da yakunlashi, navbatdagi ko‘chishdan so‘ng esa 2028 yilning yanvar oyida u yerga qaytishni rejalashtirmoqda.
Hozirda stadion 62 minggacha tomoshabinni o‘z bag‘riga sig‘dira oladi. Mavsum davomida bu ko‘rsatkichni 75 mingga, jamoa 2028 yilda qaytganida esa 95 mingga yetkazish hisob-kitob qilingan. Ishlarni to‘liq 2028/29 yilgi mavsum oldidan yakunlash rejalashtirilgan bo‘lib, o‘shanda sig‘im 105 mingga yetadi.
