Xalqaro futbol federasiyasi — FIFA «Fenerbaxche»ga uchta transfer oynasi davomida yangi futbolchilarni ro‘yxatdan o‘tkazishni taqiqladi.

Turkiya klubi hal etilmagan moliyaviy majburiyatlari sabab sanksiya qo‘llanilgan jamoalarning yangilangan ro‘yxatiga kiritildi.

Hozircha na FIFA, na «Fenerbaxche» rahbariyati qarz miqdori va da’vo qilayotgan tomon kim ekanini ma’lum qilgan. Klub ham aksiyadorlar yoki matbuot uchun rasmiy bayonot bergani yo‘q.

«Fenerbaxche» qarzni to‘liq uzishi bilan transfer taqiqi bekor qilinishi mumkin. Biroq muammoni hal qilish cho‘zilib ketsa, yangi futbolchilar bilan oldindan erishilgan kelishuvlar buzilishi va jamoadagi barqarorlikka ta’sir qilishi mumkin.

Shu sabab «Fenerbaxche» keyingi transfer oynasi ochilguniga qadar masalani tezda hal qilishi kerak. Bu jamoaga Turkiya chempionligi uchun kurash va yevrokuboklarda ishtirok etish uchun tarkib chuqurligini saqlab qolish imkonini beradi.