Халқаро футбол федерацияси — ФИФА «Фенербахче»га учта трансфер ойнаси давомида янги футболчиларни рўйхатдан ўтказишни тақиқлади.
Туркия клуби ҳал этилмаган молиявий мажбуриятлари сабаб санкция қўлланилган жамоаларнинг янгиланган рўйхатига киритилди.
Ҳозирча на ФИФА, на «Фенербахче» раҳбарияти қарз миқдори ва даъво қилаётган томон ким эканини маълум қилган. Клуб ҳам акциядорлар ёки матбуот учун расмий баёнот бергани йўқ.
«Фенербахче» қарзни тўлиқ узиши билан трансфер тақиқи бекор қилиниши мумкин. Бироқ муаммони ҳал қилиш чўзилиб кетса, янги футболчилар билан олдиндан эришилган келишувлар бузилиши ва жамоадаги барқарорликка таъсир қилиши мумкин.
Шу сабаб «Фенербахче» кейинги трансфер ойнаси очилгунига қадар масалани тезда ҳал қилиши керак. Бу жамоага Туркия чемпионлиги учун кураш ва еврокубокларда иштирок этиш учун таркиб чуқурлигини сақлаб қолиш имконини беради.
