UEFA prezidenti Aleksander Cheferin FIFA rahbari Janni Infantinoni iste’foga chiqishga chaqirdi. Cheferin futbol sotilmasligi va u uni boshqarayotgan shaxslardan ustun ekanini yana bir bor ta’kidladi.
Sloveniyalik funksioner Yevropa klublari assosiasiyasi (ECA) yig‘ilishida nutq so‘zladi. Infantino ham ushbu tadbirga taklif etilgan edi, ammo unda ishtirok etmadi.
«Yetar deyish vaqti keldi. Tasavvur qiling, sizdan yashirincha sizning merosingizni sotish masalasini muhokama qilishyapti. Futbol uni boshqarayotganlardan muhimroq», — deya Cheferinning so‘zlarini L'Equipe keltirdi.
Avvalroq UEFA 2027 yilda bo‘lib o‘tadigan FIFA prezidenti saylovida «PSJ» prezidenti Nosir Al-Xelayfiy nomzodini ilgari surishni rejalashtirgani xabar qilingan edi. Biroq Al-Xelayfiy bu taklifni rad etgan va Cheferinga UEFA prezidenti lavozimiga yana bir bor saylanishni taklif qilgan.
