УЕФА президенти Александер Чеферин ФИФА раҳбари Жанни Инфантинони истеъфога чиқишга чақирди. Чеферин футбол сотилмаслиги ва у уни бошқараётган шахслардан устун эканини яна бир бор таъкидлади.
Словениялик функционер Европа клублари ассоциацияси (ECA) йиғилишида нутқ сўзлади. Инфантино ҳам ушбу тадбирга таклиф этилган эди, аммо унда иштирок этмади.
«Етар дейиш вақти келди. Тасаввур қилинг, сиздан яширинча сизнинг меросингизни сотиш масаласини муҳокама қилишяпти. Футбол уни бошқараётганлардан муҳимроқ», — дея Чефериннинг сўзларини L'Equipe келтирди.
Аввалроқ УЕФА 2027 йилда бўлиб ўтадиган ФИФА президенти сайловида «ПСЖ» президенти Носир Ал-Хелайфий номзодини илгари суришни режалаштиргани хабар қилинган эди. Бироқ Ал-Хелайфий бу таклифни рад этган ва Чеферинга УЕФА президенти лавозимига яна бир бор сайланишни таклиф қилган.
