WBC, WBO, IBO, WBA Super, The Ring va IBF versiyalari bo‘yicha super og‘ir vazn toifasida sobiq jahon chempioni, britaniyalik Tayson Fyuri AQSH prezidenti Donald Trampni hamyurti Entoni Joshuaga qarshi bo‘lajak jangiga taklif qilmoqchi ekanini ma’lum qildi. Ularning janggi 11 dekabr kuni Kardiffda bo‘lib o‘tadi.

«Men albatta bu taklifni eski do‘stimga bildiraman va u rozi bo‘ladimi-yo‘qmi, ko‘ramiz. Hozirgi maqomini hisobga olsak, ehtimol, yo‘q — axir u AQSH prezidenti», — deya Fyurining so‘zlarini BBC keltirmoqda.

Joshua professional darajada 2013 yildan buyon ishtirok etib kelmoqda. Uning rekordida 30 ta g‘alaba bor, ularning 27 tasida u jangni muddatidan oldin yakunlagan, shuningdek, 4 ta mag‘lubiyati mavjud.

Tayson Fyuri 37 yoshda. Britaniyalik bokschining professional rekordida 35 ta g‘alaba bor, ularning 25 tasi nokaut bilan qo‘lga kiritilgan. Shuningdek, uning hisobida 2 ta mag‘lubiyat va 1 ta durang bor.