Argentina terma jamoasi bosh murabbiyi Lionel Skaloni Lionel Messining o‘rnini qanday to‘ldirish mumkinligi haqida fikr bildirdi. Avvalroq 39 yoshli hujumchi milliy jamoa safidagi xayrlashuv uchrashuvini o‘tkazgan edi.

Beninga qarshi 3:0 hisobida yakunlangan o‘rtoqlik bahsida Messi jamoasining barcha uchta golida ishtirok etdi: bitta gol urdi va ikkita golli uzatmani amalga oshirdi.

"Messining yo‘qligini qoplashning yagona yo‘li — har bir futbolchi o‘z hissasini qo‘shadigan buyuk jamoa bo‘lish.

Avval biz yomon o‘yin o‘tkazsak ham, Leo o‘zining dahosi evaziga uchrashuv taqdirini hal qilib qo‘ya olardi. Endi esa bizda bunday futbolchi yo‘q.

Ammo ko‘p narsaga qodir bo‘lgan jamoamiz bor", — deya Skalonining so‘zlarini Ole keltirdi.

Mutaxassisning fikricha, futbol olami Messiga o‘xshagan boshqa futbolchini endi ko‘rmasligi mumkin. Skaloni, shuningdek, Messining Argentina terma jamoasi uchun qilgan barcha ishlari uchun undan doimo minnatdor bo‘lishini ta’kidladi.