2025 yilgi Afrika millatlar kubogining Rabot shahrida o‘tkazilgan mojaroli finalidan qariyb to‘qqiz oy o‘tib, Marokash va Senegal yana bir-biriga qarshi bahs olib bormoqda. Bu safar ikki mamlakat vakillari futbol maydonida emas, balki Shveysariyaning Lozanna shahridagi sud majlisida to‘qnash keladi.
Foot Mercato nashri xabar berishicha, 8 oktyabr, payshanba kuni Marokash va Senegal futbol federasiyalari hamda Afrika futbol konfederasiyasi (CAF) vakillari Sport arbitraj sudida (CAS) o‘z dalillarini taqdim etdi.
Ishni Fransiya vakili Jerald Simon raisligidagi uch kishilik hay’at ko‘rib chiqadi. Uning tarkibiga Luidji Fumagalli va Ulrix Xaas ham kiritilgan.
Mojaro qanday boshlangan?
Bahslarga 18 yanvar kuni bo‘lib o‘tgan Afrika millatlar kubogi finalidagi voqealar sabab bo‘lgan.
Marokash va Senegal o‘rtasidagi hal qiluvchi uchrashuvning asosiy vaqtiga qo‘shib berilgan daqiqalarda VAR tekshiruvidan so‘ng Marokash foydasiga penalti belgilangan.
Bunga norozilik bildirgan Senegal futbolchilari taxminan 16 daqiqa davomida maydonni tark etgan.
O‘yin davom ettirilgach, Marokash futbolchisi Braim Dias penaltidan foydalana olmagan.
Qo‘shimcha bo‘limlarda esa Pap Geye gol urib, Senegalga 1:0 hisobidagi g‘alabani keltirgan.
Biroq mart oyida CAF apellyasiya qo‘mitasi Senegal futbolchilarining maydonni tark etishini musobaqa qoidalarining buzilishi deb topgan.
Natijada Senegalning g‘alabasi bekor qilinib, Marokashga 3:0 hisobida texnik g‘alaba va chempionlik unvoni berilgan.
Senegal futbol federasiyasi 25 mart kuni mazkur qaror ustidan shikoyat kiritgan.
Tomonlar qanday dalillarni keltirmoqda?
Marokash tomoni musobaqa qoidalarida hech qanday istisno nazarda tutilmaganini ta’kidlamoqchi. Ularning fikricha, jamoa maydonni qanchalik qisqa muddatga tark etganidan qat’i nazar, qoidabuzarlik uchun belgilangan chora qo‘llanishi kerak.
Senegal esa Xalqaro futbol assosiasiyalari kengashi (IFAB) qoidalarining 5-moddasiga tayanib, uchrashuv bosh hakami vakolatlarini asosiy dalil sifatida keltirmoqchi.
Hozircha yakuniy qaror qachon e’lon qilinishi belgilanmagan.
