Milanning "Inter" va Angliyaning "Brayton" klublari Yevropaning kuchli beshlik chempionatlarida o‘ziga xos statistik ko‘rsatkich bo‘yicha yetakchilik qilmoqda.
"Inter"ning xorvatiyalik futbolchisi Petar Suchich Italiya A Seriyasi doirasida "Parma"ga qarshi uchrashuvda gol urganidan so‘ng, joriy mavsumda milanliklar safida raqib darvozasini ishg‘ol qilgan futbolchilar soni 10 nafarga yetdi.
Qizig‘i, Yevropaning kuchli beshlik chempionatlarida ishtirok etayotgan klublar orasida faqat "Brayton" shunday natija qayd etgan. Angliya jamoasi tarkibida ham joriy mavsumda 10 nafar turli futbolchi gol urishga muvaffaq bo‘lgan.
Shu tariqa, "Inter" va "Brayton" bu ko‘rsatkich bo‘yicha Yevropaning top-5 ligasida yetakchilik qilmoqda.
Har ikki jamoa o‘z milliy chempionatida ham yuqori o‘rinlar uchun kurash olib bormoqda. Agar "Inter"dan bunday natijalar kutilishi tabiiy bo‘lsa, "Brayton"ning muvaffaqiyatli ishtiroki ko‘pchilik uchun kutilmagan holat bo‘lmoqda.
