«Bryugge» bosh murabbiyi Ivan Leko UYEFA Chempionlar ligasi doirasida «Inter»ga qarshi bo‘lib o‘tadigan uchrashuv oldidan matbuot anjumanida ishtirok etdi.
Xorvatiyalik mutaxassis Milan klubining o‘yin uslubi va taktik tizimiga yuqori baho berib, raqibga qarshi kurashish oson bo‘lmasligini ta’kidladi.
«Men 3-5-2 taktik sxemasining katta muxlisiman. Bu tizim hujumda ham, himoyada ham samarali harakat qilish imkonini beradi. Umid qilamanki, uchrashuvdan keyin ularga qarshi o‘ynash oson bo‘lganini ayta olaman.
Faoliyatimning deyarli barcha davrida ushbu sxema bilan ishlaganman. «Inter» qo‘llayotgan variant esa men ko‘rgan eng mukammal tizimlardan biri. Ular har hafta juda dinamik futbol namoyish etmoqda. Raqibga qaysi jihatlarda muammo tug‘dirishimiz mumkinligini bilamiz, ammo buni amalga oshirish oson bo‘lmaydi», — dedi Leko.
Shuningdek, «Bryugge» ustozi jamoasi Milandagi uchrashuvda ham o‘z o‘yin falsafasidan voz kechmasligini ta’kidladi.
«Biz jasorat bilan o‘ynaymiz, biroq ayni paytda aql bilan, ayyorlik ishlatib harakat qilishimiz kerak. Gol urishimiz shart, darvozabonimiz esa, ehtimol, bir necha bor mo‘’jiza ko‘rsatishiga to‘g‘ri kelar.
Shunga qaramay, o‘z o‘yin falsafamizni tubdan o‘zgartirish niyatimiz yo‘q. Biz g‘alaba qozonish uchun maydonga tushamiz», — deya qo‘shimcha qildi murabbiy.
Eslatib o‘tamiz, «Inter» va «Bryugge» o‘rtasidagi Chempionlar ligasi umumiy bosqichining 2-tur uchrashuvi 13 oktyabr kuni bo‘lib o‘tadi.
