«Roma» bosh murabbiyi Jan Pyero Gasperini UYEFA Chempionlar ligasi doirasida Madridning «Real» klubiga qarshi bo‘lib o‘tadigan uchrashuv oldidan matbuot anjumanida ishtirok etib, raqibning salohiyati va jamoasining imkoniyatlari haqida fikr bildirdi.
Italiyalik mutaxassis «Real»ning jahon futbolidagi nufuzi va boy tarixini e’tirof etgan holda, raqibni faqat uning nomiga qarab baholash to‘g‘ri emasligini ta’kidladi.
«Real» — juda murakkab raqib. Bu klub butun dunyoga mashhur, ulkan muxlislar armiyasiga ega va ko‘plab sovrinlarni qo‘lga kiritgan.
Biroq biz o‘z imkoniyatlarimizni baholashda raqibning obro‘siga emas, balki uning maydondagi haqiqiy darajasiga e’tibor qaratishimiz kerak.
Biz Italiyaning eng kuchli jamoalari qatoriga kiradigan «Inter» va «Komo»ga qarshi o‘ynadik. Endi esa «Real» bilan bahsda o‘z kuchimizni sinab ko‘ramiz va nimalarga qodir ekanimizni bilib olamiz», — dedi Gasperini.
Ma’lumot uchun, «Roma» va «Real» Yevropa musobaqalari doirasida shu kunga qadar 12 marta o‘zaro to‘qnash kelgan.
Ushbu uchrashuvlarning 8 tasida madridliklar g‘alaba qozongan bo‘lsa, rimliklar 3 marta zafar quchgan. Yana bitta bahs durang bilan yakunlangan.
Jamoalar o‘rtasidagi navbatdagi to‘qnashuv 14 oktyabr kuni UYEFA Chempionlar ligasi umumiy bosqichining 2-turi doirasida bo‘lib o‘tadi.
