«Barselona» himoyachisi Erik Garsiya «Galatasaroy»ga qarshi avvalgi uchrashuvni eslab, jamoaning 2022 yildan buyon qanday o‘zgargani haqida fikr bildirdi.

Seshanba kuni kataloniyaliklar UYEFA Chempionlar ligasi umumiy bosqichida Istanbulda «Galatasaroy»ni 4:1 hisobida mag‘lub etdi.

Jamoalar bunga qadar 2022 yil mart oyida Yevropa ligasining 1/8 finalida to‘qnash kelgan edi. O‘shanda «Barselona» o‘z maydonida 0:0 hisobida durang o‘ynagan, safarda esa 2:1 hisobida g‘alaba qozonib, keyingi bosqichga yo‘l olgan.

«Hozirgina Pedri bilan 2022 yilda Yevropa ligasida o‘ynaganimizda Turkiyaga kelganimizni esladik.

O‘shandan beri jamoamiz juda katta o‘zgarishlarga uchradi. Biz ko‘p narsaga erishdik va sezilarli darajada kuchaydik. Ammo oldimizda hali ko‘p vazifalar turibdi.

Bizda ajoyib tarkib bor. O‘sha davrdan beri jamoada o‘ynab kelayotgan futbolchilar ham yanada o‘sishga erishdi», — deya Erik Garsiyaning so‘zlarini keltirmoqda Barca Universal.

«Barselona» Chempionlar ligasining navbatdagi turida «Pari Sen-Jermen»ga qarshi maydonga tushadi. Uchrashuv 20 oktyabr kuni Parijda bo‘lib o‘tadi.