Madridning «Real» klubi televideniyesi Vinisius Juniorning Ispaniya chempionatida to‘rtta uchrashuvga diskvalifikasiya qilinishiga keskin munosabat bildirdi.
Braziliyalik vinger La Liga doirasidagi «Vilyarreal»ga qarshi uchrashuvda (1:0) qizil kartochka olgani sababli to‘rtta o‘yindan chetlatilgan edi.
«Real» klubi televideniyesi boshlovchisi mazkur qarorni tanqid qilib, Ispaniya chempionati va Yevropa Chempionlar ligasidagi hakamlik o‘rtasida jiddiy farq borligini ta’kidladi.
«Vinisius masalasiga kelsak, bu — haqiqiy urush.
Chempionlar ligasida Vinisiusga qarshi amalga oshiriladigan "podkatlar" Ispaniya chempionatidagilarga o‘xshamaydi. Agar shunday qo‘pol harakatlar sodir etilsa ham, ular tegishli tarzda jazolanadi. U yerda noxolis munosabat yo‘q.
Faqat Ispaniya hakamlari Chempionlar ligasidagi «Real» ishtirokidagi o‘yinlarni ham boshqarishi yetmay turgandi... Bu dahshatli bo‘lardi», — dedi «Real» klubi televideniyesi boshlovchisi.
