«Barselona» yarim himoyachisi Fermin Lopes jarohatlar sabab hayotida murakkab davrni boshdan kechirganini va ruhiy qiyinchiliklarni yengib o‘tish uchun psixolog yordamiga murojaat qilganini ma’lum qildi.
Ispaniyalik futbolchining ta’kidlashicha, so‘nggi oylardagi qiyinchiliklar uni hayotga boshqacha nazar bilan qarashga undagan.
«So‘nggi bir necha oy men uchun juda og‘ir kechdi. Shu sababli psixolog bilan ko‘plab mashg‘ulotlar o‘tkazishimga to‘g‘ri keldi.
Bu menga kundalik hayotdagi oddiy narsalarning qadriga ko‘proq yetishni o‘rgatdi. Shuningdek, oilam bilan munosabatlarimni yanada mustahkamlashga yordam berdi», — deya Lopesning so‘zlarini keltiradi Barça Universal.
Qayd etish joiz, Fermin Lopes joriy mavsumda «Barselona» safida barcha musobaqalar doirasida 9 ta uchrashuvda ishtirok etib, 5 ta gol urdi va 2 ta golli uzatmani amalga oshirdi.
«Barselona» navbatdagi uchrashuvini 17 oktyabr kuni Ispaniya La Ligasining 9-turi doirasida safarda «Betis»ga qarshi o‘tkazadi.
Bahs Toshkent vaqti bilan soat 21:30 da boshlanishi rejalashtirilgan.
