«Барселона» ярим ҳимоячиси Фермин Лопес жароҳатлар сабаб ҳаётида мураккаб даврни бошдан кечирганини ва руҳий қийинчиликларни енгиб ўтиш учун психолог ёрдамига мурожаат қилганини маълум қилди.

Испаниялик футболчининг таъкидлашича, сўнгги ойлардаги қийинчиликлар уни ҳаётга бошқача назар билан қарашга ундаган.

«Сўнгги бир неча ой мен учун жуда оғир кечди. Шу сабабли психолог билан кўплаб машғулотлар ўтказишимга тўғри келди.

Бу менга кундалик ҳаётдаги оддий нарсаларнинг қадрига кўпроқ етишни ўргатди. Шунингдек, оилам билан муносабатларимни янада мустаҳкамлашга ёрдам берди», — дея Лопеснинг сўзларини келтиради Barça Universal.

Қайд этиш жоиз, Фермин Лопес жорий мавсумда «Барселона» сафида барча мусобақалар доирасида 9 та учрашувда иштирок этиб, 5 та гол урди ва 2 та голли узатмани амалга оширди.

«Барселона» навбатдаги учрашувини 17 октябрь куни Испания Ла Лигасининг 9-тури доирасида сафарда «Бетис»га қарши ўтказади.

Баҳс Тошкент вақти билан соат 21:30 да бошланиши режалаштирилган.