«Barselona» bosh murabbiyi Hans-Diter Flik jamoaning hujum chizig‘ini kuchaytirish niyatida. Germaniyalik mutaxassis markaziy hujumchi pozisiyasi uchun yangi nomzodni belgilab olgani xabar qilinmoqda.
Flik seshanba kuni «Galatasaroy» safida harakat qilayotgan Viktor Osimxenning o‘yinini diqqat bilan kuzatgan. Biroq murabbiy nigeriyalik futbolchi «Barselona»ning hozirgi tarkibini sezilarli darajada kuchaytira olmaydi, degan xulosaga kelgan.
Kataloniyaliklar kelajakda jamoa yetakchisiga aylanishi mumkin bo‘lgan hujumchi izlamoqda. Shu paytgacha klub bilan Xulian Alvares va Erling Xoland kabi yulduzlarning nomlari bog‘lab kelinayotgan edi.
Biroq El Nacional nashri tarqatgan ma’lumotga ko‘ra, Flik e’tiborini boshqa futbolchiga qaratgan.
Germaniyalik murabbiy Rafinyaning markaziy hujumchi pozisiyasida muvaffaqiyatli harakat qilayotgani, shuningdek, tarkibda Gabriel Jezus va Hamza Abdulkarim borligini inobatga olib, yangi forvard uchun haddan tashqari katta mablag‘ sarflashni maqsadga muvofiq deb hisoblamayapti.
«Alvares va Xoland haqida ko‘p gapirilmoqda. Ular asosiy nomzodlar sifatida ko‘rilmoqda. Biroq germaniyalik murabbiy Joan Laporta va Dekuga boshqacha uslubdagi futbolchiga e’tibor qaratishni tavsiya qilmoqda.
Flik yosh, istiqbolli va yuqori saviyada o‘zini ko‘rsatishga ulgurgan hujumchini jamoaga taklif etish tarafdori. Shu nuqtai nazardan, uning e’tiborini Eli Junior Krupi tortgan», — deb yozadi Ispaniya nashri.
Ma’lumotlarga ko‘ra, Flik Angliyaning «Bornmut» klubida o‘ynayotgan 20 yoshli Eli Junior Krupining salohiyatini yuqori baholamoqda.
Fransiya yoshlar terma jamoasi futbolchisi hisoblangan hujumchining transfer qiymati Transfermarkt portali tomonidan 70 million yevroga baholangan.
Hozircha «Barselona»ning Krupi transferi bo‘yicha rasmiy muzokaralarga kirishgani haqida ma’lumot yo‘q.
