Kataloniya polisiyasi «Barselona» klubi bir nechta futbolchisining uylariga, shuningdek, boshqa qimmatbaho ko‘chmas mulk ob’ektlariga o‘g‘irlikka tushishda gumonlanayotgan uch nafar shaxsni hibsga oldi.
Derbyderbyderby.it nashrining La Vanguardia gazetasiga tayanib xabar berishicha, jinoiy guruh a’zolaridan biri Pau Kubarsi va Joan Garsiyaga tegishli soatlar borligi bilan maqtanganidan so‘ng, polisiya gumonlanuvchilar iziga tushgan.
Tergov davomida Barselona atrofidagi hashamatli uylar va badavlat oilalarning xonadonlarida sodir etilgan bir qator o‘g‘irliklarga aloqador shaxslar aniqlangan. Jinoyatlar orasida «Barselona»ning bir nechta futbolchisi yashaydigan uylarga qilingan hujumlar ham bor.
Qo‘lga olinganlar orasida Kosovoda tug‘ilgan 58 yoshli erkak bo‘lib, u hashamatli uylarni o‘marishga ixtisoslashgani aytilmoqda. Shuningdek, kokain savdosi bilan bog‘liq ishlar tufayli huquqni muhofaza qiluvchi organlarga tanish bo‘lgan 51 yoshli ispaniyalik erkak va avval 18 ta huquqbuzarlik sodir etgani qayd etilgan 40 yoshli ispaniyalik ayol ham hibsga olingan.
