Каталония полицияси «Барселона» клуби бир нечта футболчисининг уйларига, шунингдек, бошқа қимматбаҳо кўчмас мулк объектларига ўғирликка тушишда гумонланаётган уч нафар шахсни ҳибсга олди.

Derbyderbyderby.it нашрининг La Vanguardia газетасига таяниб хабар беришича, жиноий гуруҳ аъзоларидан бири Пау Кубарси ва Жоан Гарсияга тегишли соатлар борлиги билан мақтанганидан сўнг, полиция гумонланувчилар изига тушган.

Тергов давомида Барселона атрофидаги ҳашаматли уйлар ва бадавлат оилаларнинг хонадонларида содир этилган бир қатор ўғирликларга алоқадор шахслар аниқланган. Жиноятлар орасида «Барселона»нинг бир нечта футболчиси яшайдиган уйларга қилинган ҳужумлар ҳам бор.

Қўлга олинганлар орасида Косовода туғилган 58 ёшли эркак бўлиб, у ҳашаматли уйларни ўмаришга ихтисослашгани айтилмоқда. Шунингдек, кокаин савдоси билан боғлиқ ишлар туфайли ҳуқуқни муҳофаза қилувчи органларга таниш бўлган 51 ёшли испаниялик эркак ва аввал 18 та ҳуқуқбузарлик содир этгани қайд этилган 40 ёшли испаниялик аёл ҳам ҳибсга олинган.