Shveysariyada joylashgan CIES Football Observatory sport tadqiqotlari markazi Saudiya Arabistonining to‘rtta yetakchi klubi faoliyatiga bag‘ishlangan xalqaro tadqiqot natijalarini e’lon qildi.
Dunyo futbolidagi statistik ko‘rsatkichlar, transfer bozori, futbolchilarning qiymati va samaradorligini tahlil qilish bilan shug‘ullanuvchi markaz ma’lumotlariga ko‘ra, 2022 yilgi yozgi transferlar oynasidan buyon Saudiya Arabistonining to‘rtta yirik klubi jami 1,04 milliard yevro miqdorida moliyaviy yo‘qotishga uchragan.
"Al-Hilol" — eng katta yo‘qotishga uchragan klub
Ushbu reytingda "Al-Hilol" birinchi o‘rinni egalladi. Saudiya klubining umumiy moliyaviy yo‘qotishlari 502 million yevroga yetgan.
Shundan 315 million yevro futbolchilarni sotib olishga sarflangan mablag‘lar va ularni sotishdan tushgan daromadlar o‘rtasidagi salbiy farq hisobiga to‘g‘ri keladi. Qolgan 187 million yevro esa jamoaning amaldagi tarkibidagi futbolchilar bozor qiymatining pasayishi bilan bog‘liq.
Saudiyaning to‘rtta klubi kuchli oltilikda
E’tiborlisi, Saudiya Arabistoni Pro-ligasining to‘rtta yetakchi klubi moliyaviy yo‘qotishlar bo‘yicha jahon reytingidagi dastlabki oltita o‘rindan to‘rttasini egallagan.
Xususan, Krishtianu Ronaldu to‘p surayotgan "Al-Nasr" 229 million yevrolik salbiy ko‘rsatkich bilan uchinchi o‘rindan joy olgan.
"Al-Ittihod" 175 million yevro yo‘qotish bilan beshinchi, "Al-Ahli" esa 134 million yevrolik salbiy ko‘rsatkich bilan oltinchi o‘rinni egallagan.
Angliyaning ikki klubi ham reytingdan o‘rin oldi
Moliyaviy yo‘qotishlar bo‘yicha kuchli oltilikka Angliya Premyer-ligasining ikki vakili ham kirgan.
"Manchester Yunayted" 405 million yevro miqdoridagi yo‘qotish bilan reytingda ikkinchi o‘rinni egallagan bo‘lsa, "Tottenxem" 188 million yevrolik salbiy ko‘rsatkich bilan to‘rtinchi pog‘onadan joy olgan.
Shu tariqa, CIES tadqiqotiga ko‘ra, 2022 yil yozidan buyon transfer faoliyati va futbolchilar bozor qiymatidagi o‘zgarishlar bilan bog‘liq eng katta moliyaviy yo‘qotishlar Saudiya Arabistoni hamda Angliyaning yetakchi klublarida qayd etilgan.
