Швейцарияда жойлашган CIES Football Observatory спорт тадқиқотлари маркази Саудия Арабистонининг тўртта етакчи клуби фаолиятига бағишланган халқаро тадқиқот натижаларини эълон қилди.
Дунё футболидаги статистик кўрсаткичлар, трансфер бозори, футболчиларнинг қиймати ва самарадорлигини таҳлил қилиш билан шуғулланувчи марказ маълумотларига кўра, 2022 йилги ёзги трансферлар ойнасидан буён Саудия Арабистонининг тўртта йирик клуби жами 1,04 миллиард евро миқдорида молиявий йўқотишга учраган.
"Ал-Ҳилол" — энг катта йўқотишга учраган клуб
Ушбу рейтингда "Ал-Ҳилол" биринчи ўринни эгаллади. Саудия клубининг умумий молиявий йўқотишлари 502 миллион еврога етган.
Шундан 315 миллион евро футболчиларни сотиб олишга сарфланган маблағлар ва уларни сотишдан тушган даромадлар ўртасидаги салбий фарқ ҳисобига тўғри келади. Қолган 187 миллион евро эса жамоанинг амалдаги таркибидаги футболчилар бозор қийматининг пасайиши билан боғлиқ.
Саудиянинг тўртта клуби кучли олтиликда
Эътиборлиси, Саудия Арабистони Про-лигасининг тўртта етакчи клуби молиявий йўқотишлар бўйича жаҳон рейтингидаги дастлабки олтита ўриндан тўрттасини эгаллаган.
Хусусан, Криштиану Роналду тўп сураётган "Ал-Наср" 229 миллион евролик салбий кўрсаткич билан учинчи ўриндан жой олган.
"Ал-Иттиҳод" 175 миллион евро йўқотиш билан бешинчи, "Ал-Аҳли" эса 134 миллион евролик салбий кўрсаткич билан олтинчи ўринни эгаллаган.
Англиянинг икки клуби ҳам рейтингдан ўрин олди
Молиявий йўқотишлар бўйича кучли олтиликка Англия Премьер-лигасининг икки вакили ҳам кирган.
"Манчестер Юнайтед" 405 миллион евро миқдоридаги йўқотиш билан рейтингда иккинчи ўринни эгаллаган бўлса, "Тоттенхэм" 188 миллион евролик салбий кўрсаткич билан тўртинчи поғонадан жой олган.
Шу тариқа, CIES тадқиқотига кўра, 2022 йил ёзидан буён трансфер фаолияти ва футболчилар бозор қийматидаги ўзгаришлар билан боғлиқ энг катта молиявий йўқотишлар Саудия Арабистони ҳамда Англиянинг етакчи клубларида қайд этилган.
