"Manchester Yunayted"ning sobiq yarim himoyachisi Ander Errera Angliya klubini tark etishiga sabab bo‘lgan voqealarni esladi.

Ispaniyalik futbolchining aytishicha, u mavsum yakunlariga ko‘ra jamoaning eng yaxshi o‘yinchisi deb topilganidan so‘ng klub rahbariyati bilan yangi shartnoma borasida muzokara o‘tkazishni kutgan. Biroq buning o‘rniga unga amaldagi kelishuv avtomatik tarzda yana bir yilga uzaytirilgani haqida xat yuborilgan.

"Klubning o‘zi men bilan bog‘lanishini kutgandim. Agentimga: "Ular qanday shartlar taklif qilishidan qat’i nazar, men rozi bo‘laman. Shartnomani imzolayman, chunki "Manchester Yunayted"da qolishni xohlayman. Bu yerda o‘zimni juda baxtli his qilyapman", — degandim", — deya Errera Rio Ferdinand Presents podkastida so‘zlab berdi.

Biroq klub rahbariyatining munosabati futbolchining hafsalasini pir qilgan.

"Ular hatto qo‘ng‘iroq qilib: "Ander, biz sening jamoada qolishingni xohlaymiz", — deb ham aytishmadi. Buning o‘rniga oddiygina xat yuborishdi.

Xatni olganimda: "Bo‘ldi, menga shunisi yetarli", — deb o‘yladim. O‘sha paytda yuragim allaqachon biroz singan edi", — dedi ispaniyalik futbolchi.

Eslatib o‘tamiz, Ander Errera "Manchester Yunayted" safida besh yil faoliyat yuritib, jamoa bilan to‘rtta sovrinni qo‘lga kiritgan. Ular orasida Angliya kubogi ham bor.

2019 yil yozida ispaniyalik yarim himoyachi erkin agent maqomida "Manchester Yunayted"ni tark etib, Fransiyaning "PSJ" klubiga o‘tgan edi.