Niderlandiyalik taniqli murabbiy Lui van Gal "Manchester Siti"ning moliyaviy qoidalarni buzgani uning "Manchester Yunayted" bosh murabbiyligidan iste’foga chiqarilishiga ta’sir ko‘rsatgan bo‘lishi mumkinligini ta’kidladi.
"2016 yilda Chempionlar ligasiga yo‘llanma ololmaganimiz, ehtimol, meni "Manchester Yunayted"dan ishdan bo‘shatish haqidagi qarorda hal qiluvchi omil bo‘lgan. Bu qaror keyinchalik ko‘plab salbiy oqibatlar va qiyinchiliklarga sabab bo‘ldi.
Endi tarixni qayta yoza olmayman. Hatto Angliya futbol assosiasiyasi ham buni o‘zgartira olmaydi", — deya van Galning The Touchline nashriga bergan fikrlarini keltiradi "Gazeta.Ru".
Eslatib o‘tamiz, Lui van Gal 2014–2016 yillarda "Manchester Yunayted"ni boshqargan. Niderlandiyalik mutaxassis "qizil iblislar" bilan Angliya kubogini qo‘lga kiritgan.
2015/2016 yilgi mavsum yakunlariga ko‘ra, "Manchester Yunayted" Angliya Premyer-ligasida beshinchi o‘rinni egallab, Chempionlar ligasi yo‘llanmasidan quruq qolgan edi.
O‘sha mavsumda "Manchester Siti" ham "MYU" bilan bir xil ochko to‘plagan, ammo to‘plar nisbati yaxshiroq bo‘lgani sababli to‘rtinchi o‘rinni egallab, Chempionlar ligasiga yo‘l olgan.
Avvalroq mustaqil komissiya "Manchester Siti"ni 2009–2018 yillar davomida ko‘plab moliyaviy qoidabuzarliklarga yo‘l qo‘ygan deb topgani xabar qilingan edi. Biroq Manchester klubi bu qarorga qo‘shilmagan va apellyasiya shikoyati kiritgan.
