Нидерландиялик таниқли мураббий Луи ван Гал "Манчестер Сити"нинг молиявий қоидаларни бузгани унинг "Манчестер Юнайтед" бош мураббийлигидан истеъфога чиқарилишига таъсир кўрсатган бўлиши мумкинлигини таъкидлади.
"2016 йилда Чемпионлар лигасига йўлланма ололмаганимиз, эҳтимол, мени "Манчестер Юнайтед"дан ишдан бўшатиш ҳақидаги қарорда ҳал қилувчи омил бўлган. Бу қарор кейинчалик кўплаб салбий оқибатлар ва қийинчиликларга сабаб бўлди.
Энди тарихни қайта ёза олмайман. Ҳатто Англия футбол ассоциацияси ҳам буни ўзгартира олмайди", — дея ван Галнинг The Touchline нашрига берган фикрларини келтиради "Газета.Ru".
Эслатиб ўтамиз, Луи ван Гал 2014–2016 йилларда "Манчестер Юнайтед"ни бошқарган. Нидерландиялик мутахассис "қизил иблислар" билан Англия кубогини қўлга киритган.
2015/2016 йилги мавсум якунларига кўра, "Манчестер Юнайтед" Англия Премьер-лигасида бешинчи ўринни эгаллаб, Чемпионлар лигаси йўлланмасидан қуруқ қолган эди.
Ўша мавсумда "Манчестер Сити" ҳам "МЮ" билан бир хил очко тўплаган, аммо тўплар нисбати яхшироқ бўлгани сабабли тўртинчи ўринни эгаллаб, Чемпионлар лигасига йўл олган.
Аввалроқ мустақил комиссия "Манчестер Сити"ни 2009–2018 йиллар давомида кўплаб молиявий қоидабузарликларга йўл қўйган деб топгани хабар қилинган эди. Бироқ Манчестер клуби бу қарорга қўшилмаган ва апелляция шикояти киритган.
