O‘zbekiston Superligasining 24-turida Farg‘ona derbisi bo‘lib o‘tdi. Qo‘qondagi “Markaziy” stadionida kechgan bahsda “Neftchi” mehmonda “Qo‘qon-1912”ni 4:2 hisobida mag‘lub etdi. Ushbu g‘alaba orqali farg‘onaliklar turnir jadvalida yakka peshqadamga aylanishdi.
Uchrashuvni faol boshlagan “Neftchi” bir qator xavfli hujumlar tashkil etdi. Biroq hisobni ochish mezbonlarga nasib qildi. 11-daqiqada qarshi hujumga o‘tgan “Qo‘qon-1912” futbolchilari jarima maydonchasiga uzatma berishdi va Toma Tabatadze bosh bilan aniq zarba yo‘llab, jamoasini hisobda oldinga olib chiqdi — 1:0.
O‘tkazib yuborilgan goldan keyin “Neftchi” tezda tashabbusni o‘z qo‘liga oldi. 14-daqiqada Zoran Marushich kuchli va aniq zarba bilan hisobni tenglashtirdi — 1:1. Qolgan daqiqalarda mehmonlar bosimni kuchaytirishdi, ammo birinchi bo‘limda boshqa gol kiritilmadi.
Ikkinchi bo‘lim boshlanishi bilan “Neftchi” yana hujumga o‘tdi. 48-daqiqada burchak zarbasidan keyin Nurmuhammad Abdug‘aniyev yaqin masofadan to‘pni darvozaga joylab qo‘ydi — 1:2. Biroq qo‘qonliklar oradan ikki daqiqa o‘tib javob qaytarishdi. Shahzod Akramovning uzoq masofadan yo‘llagan kuchli zarbasi hisobni yana tenglashtirdi — 2:2.
57-daqiqada Asilbek Jumayevning zarbasidan qaytgan to‘pni Zoran Marushich darvozaga joylab, dubl qayd etdi va “Neftchi”ni yana oldinga olib chiqdi — 2:3.
Uchrashuvning 61-daqiqasida Nurmuhammad Abdug‘aniyev raqib hujumini qo‘pollik bilan to‘xtatgani uchun to‘g‘ridan-to‘g‘ri qizil kartochka bilan jazolandi. Shunga qaramay, bir kishi kam bo‘lib qolgan farg‘onaliklar hujumkor o‘yinni davom ettirishdi.
86-daqiqada Koffi Kuoau o‘ng qanotdan raqib jarima maydonchasiga yorib kirib, kuchli zarba bilan to‘pni darvozaga yo‘lladi va uchrashuvdagi so‘nggi golni kiritdi — 2:4.
Qolgan daqiqalarda hisob o‘zgarmadi. Shu tariqa, “Neftchi” safarda muhim g‘alabani qo‘lga kiritib, Farg‘ona viloyati derbisida ustun keldi.
O‘zbekiston Superligasi. 24-tur
16 oktyabr, 2026 yil · 19:00
“Qo‘qon-1912” - “Neftchi” - 2:4
Gollar: 11' — Toma Tabatadze (1:0), 14' — Zoran Marushich (1:1), 48' — Nurmuhammad Abdug‘aniyev (1:2), 50' — Shahzod Akramov (2:2), 57' — Zoran Marushich (2:3), 86' — Koffi Kuoau (2:4)
Chetlatish: Nurmuhammad Abdug‘aniyev, 61' — “Neftchi”
