"Inter Mayami" MLS doirasidagi safar uchrashuvida "Atlanta Yunayted"ni 3:1 hisobida mag‘lub etdi.
Uchrashuvning ikkinchi bo‘limida dubl qayd etgan Lionel Messi bahs qahramoniga aylandi. O‘yin yakunlanganidan so‘ng 39 yoshli futbolchi ijtimoiy tarmoqlarda post qoldirib, joriy yilning iyul oyida aynan Atlantadagi ushbu stadionda bo‘lib o‘tgan JCH-2026 doirasida Argentina terma jamoasining Misr va Angliyaga qarshi unutilmas uchrashuvlarini esladi.
"Inter Mayami" bilan yana bir g‘alaba. Bu stadion menga unchalik uzoq bo‘lmagan o‘tmishdagi ajoyib xotiralarni yodga soladi...", — deb yozdi Messi ijtimoiy tarmoqlarda.
Eslatib o‘tamiz, Argentina terma jamoasi 2026 yilgi jahon chempionatining 1/8 finalida Misrga qarshi uchrashuvda 0:2 hisobida ortda borayotib, yakunda 3:2 hisobida g‘alabani ilib ketgan edi.
Argentinaliklar yarim finalda Angliyaga qarshi bahsda ham irodali g‘alabaga erishgan. Jamoa uchrashuv davomida 0:1 hisobida mag‘lub bo‘layotganiga qaramay, so‘nggi daqiqalarda vaziyatni o‘z foydasiga o‘zgartirib, 2:1 hisobida zafar quchgan.
Misrga qarshi uchrashuvda Messi bitta gol urib, bitta golli uzatmani amalga oshirgan bo‘lsa, Angliya bilan bahsda ikki marta jamoadoshlariga golli pas bergan edi.
