Milanning "Inter" klubi yarim himoyachisi Nikolo Barella "Bolonya"ga qarshi uchrashuvda sardorlik bog‘ichi bilan maydonga tushdi. Biroq futbolchi o‘zini jamoaning haqiqiy sardori deb hisoblamasligini ta’kidladi. Uning fikricha, bu maqom jarohat olgan Lautaro Martinesga tegishli.
"Men sardormanmi? Yo‘q, jamoamiz sardori — Lautaro. Jamoa uchun muhim futbolchi bo‘lish uchun sardorlik bog‘ichini taqish shart emas. Bu bog‘ichning unga tegishli ekani mutlaqo adolatli. Men esa baribir jamoamga o‘z hissamni qo‘shishga harakat qilaman.
Biz o‘yinimizni yanada yaxshilashimiz kerakligini tushunib turibmiz. Hatto bugungi uchrashuvning dastlabki daqiqalarida ham qiyinchiliklarga duch keldik.
O‘yinga bo‘lgan yondashuvimizni yaxshilashimiz zarur. Agar buning uddasidan chiqsak, har qanday raqibga bizga qarshi o‘ynash juda qiyin bo‘ladi", — deya Barellaning so‘zlarini keltiradi fcinter1908.it nashri.
Eslatib o‘tamiz, Nikolo Barella 2019 yildan buyon "Inter" sharafini himoya qilib kelmoqda.
