«Liverpul» himoyachisi Virjil van Deyk faoliyatini Ispaniya chempionatida davom ettirishi mumkin. Bu haqda Toskills Sports UK nashri xabar bermoqda.
Manba ma’lumotlariga ko‘ra, niderlandiyalik futbolchini o‘z safiga qo‘shib olishga «Barselona» qiziqish bildirmoqda.
Kataloniyaliklar 2027 yil yozida van Deykni erkin agent sifatida qo‘lga kiritishni rejalashtirmoqda.
Biroq bu transfer futbolchining «Liverpul» bilan yangi shartnoma imzolash-imzolamasligiga bog‘liq. Agar niderlandiyalik himoyachi mersisaydliklar bilan kelishuvini uzaytirmasa, «Barselona» uni transfer tovonisiz o‘z safiga qo‘shib olishga harakat qiladi.
Joriy mavsumda Virjil van Deyk «Liverpul» tarkibida barcha musobaqalar doirasida 9 ta uchrashuvda maydonga tushdi. Ushbu bahslarda himoyachi gol yoki golli uzatma bilan ajralib turmadi.
Eslatib o‘tamiz, Virjil van Deyk 2018 yildan buyon «Liverpul» sharafini himoya qilib kelmoqda.
