Myunxenning «Bavariya» klubi «Barselona»ning ikki futbolchisi — Dani Olmo va Jyul Kundega qiziqish bildirmoqda. Bu haqda Mundo Deportivo nashri xabar berdi.
Manbaga ko‘ra, nemis grandi anchadan buyon Olmoning o‘yinlarini kuzatib kelmoqda. Biroq myunxenliklar ispaniyalik yarim himoyachini qishki transfer oynasida sotib olishni rejalashtirmayapti. Uning transferi uzoq muddatli istiqbolda ko‘rib chiqilmoqda. Kelajakda bu kelishuv qiymati taxminan 90 million yevroga yetishi mumkin.
Shuningdek, «Bavariya» kataloniyaliklar himoyachisi Jyul Kundening xizmatlariga ham qiziqmoqda. «Barselona» fransuz futbolchisini 80–90 million yevroga baholayotgani sababli uning qishda Myunxenga ko‘chib o‘tishi amalda imkonsiz hisoblanadi.
«Bavariya» rahbariyati Kunde uchun belgilangan narxni haddan tashqari yuqori deb hisoblamoqda va hozircha vaziyatni kuzatish bilan cheklanmoqda.
Joriy mavsumda Olmo barcha musobaqalarda 11 ta o‘yin o‘tkazib, 1 ta gol va 4 ta golli uzatma muallifi bo‘ldi. Kunde esa 8 ta uchrashuvda maydonga tushib, 1 ta gol urdi va 1 ta assist qayd etdi.
