«Inter» va Italiya terma jamoasining sobiq hujumchisi Jampaolo Passini milanliklarning joriy mavsumdagi imkoniyatlarini yuqori baholadi.
Mutaxassis sifatida fikr bildirgan sobiq futbolchi A Seriyaning 7-turida «Bolonya» ustidan qozonilgan 3:1 hisobidagi g‘alabadan so‘ng «neradzurri»ning boshqa raqiblardan ajralib turadigan jihatiga e’tibor qaratdi.
«Inter» — Italiya chempionatida hatto 100 foiz tayyor bo‘lmagan holatda ham g‘alaba qozona oladigan yagona jamoa. Bunga tarkibning kuchliligi va zaxiradan sifatli futbolchilarni maydonga tushirish imkoniyati sabab bo‘lmoqda», — deya Passinining so‘zlarini keltiradi FC Inter News nashri Sport Mediaset'ga tayanib.
Eslatib o‘tamiz, «Bolonya»ga qarshi bahsda milanliklar dastlab hisobda ortda qoldi. 10-daqiqada Tommazo Pobega mezbonlarni oldinga olib chiqqan bo‘lsa, 44-daqiqada Markus Tyuram muvozanatni tikladi.
Ikkinchi bo‘limda Karlos Augusto va Anj-Yoan Bonnining gollari «Inter»ga 3:1 hisobidagi g‘alabani taqdim etdi.
Ayni paytda «Inter» 19 ochko bilan A Seriya turnir jadvalida peshqadamlik qilmoqda. Ikkinchi o‘rindagi «Lasio» ham shuncha ochko jamg‘argan, biroq milanliklar qo‘shimcha ko‘rsatkichlar bo‘yicha ustunlikka ega.
