"Barselona" bosh murabbiyi Hans-Diter Flik Ispaniya chempionatida "Real" va "Sevilya" o‘rtasidagi uchrashuvda yuz bergan bahsli vaziyatga munosabat bildirdi.

La Liganing 9-turidan o‘rin olgan bahs madridliklarning 4:1 hisobidagi g‘alabasi bilan yakunlandi. Biroq uchrashuvning 25-daqiqasida sodir bo‘lgan epizod muhokamalarga sabab bo‘ldi.

Maydon markazida "Real" yarim himoyachisi Arda Gyuler "Sevilya" futbolchisi Pekening harakatiga javoban qo‘lini siltab, unga zarba bergan. Vaziyat VAR tomonidan ko‘rib chiqilgan, ammo hakamlar qoidabuzarlik qayd etishmagan.

Mazkur epizod yuzasidan fikri so‘ralgan "Barselona" ustozi batafsil izoh berishni istamadi.

"Bu mening ishim emas", — deya Flikning so‘zlarini keltiradi AS nashri.

Eslatib o‘tamiz, "Real" ushbu bahsda Arda Gyuler, Kilian Mbappening dubl va Diomandening gollari evaziga 4:1 hisobida g‘alaba qozondi. "Sevilya"ning yagona goliga Bueno mualliflik qildi.

Ispaniya chempionatida to‘qqizta turdan keyin "Barselona" 27 ochko bilan peshqadamlik qilmoqda. "Real" 21 ochko bilan uchinchi, "Sevilya" esa 14 ochko bilan oltinchi o‘rinda bormoqda.