«Brayton» bosh murabbiyi Fabian Xyurseler «Manchester Yunayted»ni boshqarishi mumkinligi haqida tarqalayotgan xabarlarga munosabat bildirdi.
Nemis mutaxassisi hozirgi jamoasidagi faoliyatiga to‘liq e’tibor qaratganini ta’kidlab, mankunianliklar bilan bog‘liq mish-mishlar haqida o‘ylashga vaqti yo‘qligini ma’lum qildi.
«Hozir butun e’tiborimni shu yerdagi ishimga qaratganman. Bunday mish-mishlar haqida o‘ylashga vaqtim yo‘q, chunki biz har uch kunda maydonga tushyapmiz.
Bundan tashqari, men Maykl Karrikni va uning o‘tgan mavsumda «Manchester Yunayted»da amalga oshirgan ishlarini juda hurmat qilaman. U ajoyib inson va yuksak fazilatlarga ega shaxs.
Bu masalada boshqa qo‘shimcha qiladigan gapim yo‘q», — dedi Xyurseler.
Avvalroq «Manchester Yunayted» rahbariyati Maykl Karrik iste’foga chiqarilgan taqdirda, uning o‘rnini egallashi mumkin bo‘lgan murabbiylar ro‘yxatini shakllantirayotgani haqida xabarlar tarqalgandi.
Ma’lumotlarga ko‘ra, «Brayton» ustozi Fabian Xyurseler ham mankunianliklar bosh murabbiyligiga ehtimoliy nomzodlardan biri sifatida ko‘rilmoqda.
