«Брайтон» бош мураббийи Фабиан Хюрцелер «Манчестер Юнайтед»ни бошқариши мумкинлиги ҳақида тарқалаётган хабарларга муносабат билдирди.

Немис мутахассиси ҳозирги жамоасидаги фаолиятига тўлиқ эътибор қаратганини таъкидлаб, манкунианликлар билан боғлиқ миш-мишлар ҳақида ўйлашга вақти йўқлигини маълум қилди.

«Ҳозир бутун эътиборимни шу ердаги ишимга қаратганман. Бундай миш-мишлар ҳақида ўйлашга вақтим йўқ, чунки биз ҳар уч кунда майдонга тушяпмиз.

Бундан ташқари, мен Майкл Каррикни ва унинг ўтган мавсумда «Манчестер Юнайтед»да амалга оширган ишларини жуда ҳурмат қиламан. У ажойиб инсон ва юксак фазилатларга эга шахс.

Бу масалада бошқа қўшимча қиладиган гапим йўқ», — деди Хюрцелер.

Аввалроқ «Манчестер Юнайтед» раҳбарияти Майкл Каррик истеъфога чиқарилган тақдирда, унинг ўрнини эгаллаши мумкин бўлган мураббийлар рўйхатини шакллантираётгани ҳақида хабарлар тарқалганди.

Маълумотларга кўра, «Брайтон» устози Фабиан Хюрцелер ҳам манкунианликлар бош мураббийлигига эҳтимолий номзодлардан бири сифатида кўрилмоқда.