"Trabzonspor" klubi darvozaboni Andre Onana Turkiyada yo‘l-transport hodisasiga uchradi. Kamerunlik futbolchi tibbiy tekshiruvdan o‘tkazish uchun shifoxonaga olib borilgan.

Hodisa 22 oktyabr kuni "Trabzonspor"ning Konferensiyalar ligasida Shotlandiyaning "Xarts" klubi ustidan 2:0 hisobidagi g‘alabasidan keyin sodir bo‘lgan.

Ma’lumotlarga ko‘ra, 30 yoshli darvozabon oilasi bilan uyiga qaytayotgan vaqtda Trabzon yaqinidagi Yomra yo‘lida avtohalokatga uchragan. Orqadan katta tezlikda kelayotgan avtomobil Onananing mashinasiga borib urilgan. Zarba oqibatida futbolchining avtomobili oldindagi transport vositasi bilan ham to‘qnashgan.

Hodisadan so‘ng Onana ehtiyot chorasi sifatida shifoxonaga yetkazilgan. Tibbiy ko‘rik natijasida unda jiddiy jarohat aniqlanmagan va darvozabonga uyiga qaytishga ruxsat berilgan.

"Trabzonspor" prezidenti Ertug‘rul Do‘g‘an ham futbolchining sog‘lig‘iga xavf yo‘qligini tasdiqlagan. Avtohalokat vaqtida mashinada bo‘lgan Onananing oila a’zolari ham jarohat olmagan.

Eslatib o‘tamiz, kamerunlik darvozabon "Manchester Yunayted" klubiga tegishli bo‘lib, ayni paytda "Trabzonspor" safida ijara asosida harakat qilmoqda.