"Трабзонспор" клуби дарвозабони Андре Онана Туркияда йўл-транспорт ҳодисасига учради. Камерунлик футболчи тиббий текширувдан ўтказиш учун шифохонага олиб борилган.
Ҳодиса 22 октябрь куни "Трабзонспор"нинг Конференциялар лигасида Шотландиянинг "Хартс" клуби устидан 2:0 ҳисобидаги ғалабасидан кейин содир бўлган.
Маълумотларга кўра, 30 ёшли дарвозабон оиласи билан уйига қайтаётган вақтда Трабзон яқинидаги Йомра йўлида автоҳалокатга учраган. Орқадан катта тезликда келаётган автомобиль Онананинг машинасига бориб урилган. Зарба оқибатида футболчининг автомобили олдиндаги транспорт воситаси билан ҳам тўқнашган.
Ҳодисадан сўнг Онана эҳтиёт чораси сифатида шифохонага етказилган. Тиббий кўрик натижасида унда жиддий жароҳат аниқланмаган ва дарвозабонга уйига қайтишга рухсат берилган.
"Трабзонспор" президенти Эртуғрул Дўған ҳам футболчининг соғлиғига хавф йўқлигини тасдиқлаган. Автоҳалокат вақтида машинада бўлган Онананинг оила аъзолари ҳам жароҳат олмаган.
Эслатиб ўтамиз, камерунлик дарвозабон "Манчестер Юнайтед" клубига тегишли бўлиб, айни пайтда "Трабзонспор" сафида ижара асосида ҳаракат қилмоқда.
