Ispaniya terma jamoasi bosh murabbiyi Luis de la Fuente 2026 yilgi «Oltin to‘p» mukofoti uchun kurash haqida o‘z fikrlarini bildirdi.
Ispaniyalik mutaxassis Lionel Messining futbol tarixida qoldirgan ulkan merosini yuqori baholadi. Biroq u argentinalik yulduzni bu yilgi mukofot uchun o‘zining asosiy nomzodi sifatida ko‘rmayotganini ma’lum qildi.
De la Fuentedan Messining yana bir bor «Oltin to‘p»ni qo‘lga kiritish imkoniyati haqida so‘ralganda, u qisqa javob qaytardi.
«Yo‘q, yo‘q, yo‘q... Agar bu mukofotni ispaniyalik futbolchi qo‘lga kiritsa, juda xursand bo‘laman», — dedi mutaxassis.
Eslatib o‘tamiz, Lionel Messi faoliyati davomida sakkiz marta «Oltin to‘p» sohibiga aylangan. Argentinalik futbolchi 2026 yilda ham nufuzli mukofotga nomzodlar ro‘yxatidan joy olgan.
Biroq bu yil sovrin uchun asosiy favoritlar sifatida «Bavariya» hujumchisi Garri Keyn va «Barselona» vingeri Lamin Yamal ko‘rilmoqda.
Qayd etish joiz, Luis de la Fuente boshchiligidagi Ispaniya terma jamoasi 2026 yilgi jahon chempionatida g‘oliblikni qo‘lga kiritgan.
«Oltin to‘p» mukofotini topshirish marosimi 26 oktyabr, dushanba kuni London shahrida bo‘lib o‘tadi.
