"Yuventus" Yevropa ligasida "Renn"ga qarshi o‘tkazilgan uchrashuvda ikki nafar futbolchisi jarohat olganini rasman tasdiqladi.
Turinliklarning 2:2 hisobidagi durangi bilan yakunlangan umumiy bosqich 3-tur bahsida yarim himoyachi Niko Gonsales va himoyachi Zeki Chelik mushaklaridan shikastlangan.
Uchrashuvning 5-daqiqasida hisobni ochgan Chelik keyinchalik chap sonining orqa qismi mushaklarini yengil darajada cho‘zib olgan.
Niko Gonsales esa o‘ng oyog‘ining boldir qismida joylashgan kambalasimon mushakdan jarohat olgan.
"Yuventus" rasmiy saytining xabar berishicha, har ikki futbolchi allaqachon maxsus tiklanish dasturi asosida mashg‘ulotlarni boshlagan. Biroq ularning qachon maydonga qaytishi hozircha ma’lum qilinmagan.
Mazkur jarohatlar bosh murabbiy Luchano Spalletti uchun navbatdagi jiddiy muammoga aylandi.
Joriy mavsumda turinliklar Kenan Yildiz, Kefren Tyuram va Manuel Lokatellining yo‘qligi bilan bog‘liq qiyinchiliklarga ham duch kelgan edi.
Shuningdek, Fransishku Konseysau yelkasi chiqib ketganidan keyin tiklanish jarayonini davom ettirmoqda. Jeff Exator va Kamil Grabara ham hozircha jamoaga yordam bera olmayapti.
Tarkibdagi yo‘qotishlar sabab "Yuventus"ning hujum chizig‘idagi imkoniyatlari cheklanib qolgan.
Spalletti jamoasi 25 oktyabr, yakshanba kuni Italiya A Seriyasi doirasida "Lechche" mehmoni bo‘ladi. Ushbu uchrashuv oldidan turinliklar bir qator muhim futbolchilarining xizmatidan foydalana olmasligi mumkin.
