"Arsenal" bosh murabbiyi Mikel Arteta jamoaning 16 yoshli iqtidorli futbolchisi Maks Douman haqida iliq fikrlar bildirdi.
Ispaniyalik mutaxassisning ta’kidlashicha, yosh futbolchi nafaqat o‘z iste’dodi, balki xarakteri va jamoadoshlariga bo‘lgan munosabati bilan ham alohida hurmat qozongan.
Matbuot anjumanida Artetadan Douman qanday qilib qisqa vaqt ichida jamoa ichida bunday katta e’tibor va hurmatga sazovor bo‘lgani so‘raldi.
"Menimcha, bu uning xarakteri bilan bog‘liq. Undagi ishtiyoq ham juda muhim. Maks nihoyatda samimiy va beg‘ubor yigit.
U hali o‘z yo‘lini endigina boshlayapti va klub tarixining bir qismiga aylanishni istaydi.
Aynan shuning uchun hamma unga yordam berishga intiladi, jamoadoshlari u bilan yaqin munosabatda bo‘lishni xohlaydi.
Maks o‘zining xulq-atvori bilan bunday munosabatga munosib ekanini isbotladi.
Albatta, hamma uning qanchalik iqtidorli ekanini ham ko‘rib turibdi. Shu sababli barchamiz u o‘z salohiyatini imkon qadar tezroq maydonda namoyon etishini istaymiz", — dedi Arteta.
Qayd etish joiz, Maks Douman yosh bo‘lishiga qaramay, "Arsenal" futbolchilari orasida katta hurmatga sazovor bo‘lgan.
Londonliklar navbatdagi uchrashuvini 24 oktyabr kuni Angliya Premyer-ligasi doirasida "Everton"ga qarshi o‘z maydonida o‘tkazadi.
Bahs Toshkent vaqti bilan soat 19:00 da boshlanishi rejalashtirilgan.
