Londonning "Arsenal" klubi rahbariyati jamoa darvozaboni David Rayyaning Ispaniya chempionatida o‘ynash istagi haqidagi yaqindagi bayonotiga munosabat bildirdi.
Teamtalk nashri xabar berishicha, "kanonirlar" darvozabon bilan yaxshilangan shartlar asosida yangi shartnoma tuzish bo‘yicha muzokaralarni boshlashga qaror qilgan. London klubi ispaniyalik darvozabonni kamida yana ikki mavsum jamoada saqlab qolishni rejalashtirmoqda.
31 yoshli Rayyaning "Arsenal" bilan amaldagi shartnomasi 2028 yil iyun oyining oxirida tugaydi. Uning bozor qiymati 30 million yevro deb baholanmoqda.
Angliya Premyer-ligasining joriy mavsumida David sakkizta uchrashuvda maydonga tushib, o‘z darvozasidan beshta gol o‘tkazib yubordi.
