Londonda kechgan «Kristal Pelas» va «Nyukasl» o‘rtasidagi uchrashuvda mehmonlar 2:0 hisobida g‘alaba qozondi.
Birinchi bo‘limda mezbonlar ustunlikka ega bo‘ldi, ammo vaziyatlarini golga aylantira olmadi. Tanaffusdan keyin esa «Nyukasl» o‘z imkoniyatidan foydalandi: Osula hisobni ochdi. Ko‘p o‘tmay, Uilkoksning goli ofsayd sababli bekor qilindi. Biroq 58-daqiqada Barns ikkinchi to‘pni kiritib, mehmonlarning ustunligini mustahkamladi. Har ikki gol o‘ng qanotdan markazga uzatilgan to‘plardan keyin yuzaga keldi.
«Kristal Pelas» qolgan vaqtda hisobni o‘zgartira olmadi. Shu tariqa, Angliya Premyer-ligasida ketma-ket ikki mag‘lubiyatdan keyin «Nyukasl» g‘alabaga erishdi.
