"Lasio" bosh murabbiyi Jennaro Gattuzo Italiya A Seriyasi doirasida "Sassuolo" ustidan qozonilgan 6:2 hisobidagi g‘alabadan so‘ng bir nechta mavzuga to‘xtaldi.
"Sassuolo" ustidan qozonilgan g‘alaba haqida
"Jamoamizning mentalitetidan mamnunman. Haqiqat shuki, biz agressiv harakat qilmaganimizda qiynalamiz. Himoyada past blok bilan yaxshiroq o‘ynashni o‘rganishimiz kerak. "Sassuolo" juda jasur jamoa, u katta kuch bilan oldinga tashlanadi. Agar shunday o‘ynasangiz, har qanday raqibga muammo tug‘dirishingiz mumkin.
Bizning o‘z yo‘limiz bor va shu yo‘ldan har bir o‘yindan keyingi uchrashuvga qarab harakat qilishimiz kerak".
Jamoaning o‘yin uslubi haqida
"Gap irim-sirimda emas — biz yaxshi futbol ko‘rsatyapmiz. Jamoamizda ko‘plab yosh futbolchilar bor va biz jasorat bilan harakat qilishda hamda oldinga intilishda davom etishimiz kerak. O‘yinni nazorat qilish borasida hali o‘sishimiz lozim.
Hammasi mashg‘ulotlardan boshlanadi. Hozircha mag‘lub bo‘lganimiz yo‘q, ammo qachondir mag‘lubiyat ham keladi. Noslinga qarang: u ajoyib gollar urishdan tashqari, raqibni nihoyatda kuchli pressing qiladi.
Hujumda shunday futbolchingiz bo‘lsa, u raqiblarga doimiy ravishda muammo tug‘diradi. Shu ruhda davom etishimiz kerak".
Futbolchilar haqida
"Teylor texnik jihatdan ajoyib o‘yin o‘tkazdi. Ammo uning hisobida allaqachon sariq kartochka bor edi, u hakam bilan bahslasha boshladi va men uni almashtirishni ma’qul ko‘rdim. U doimo kerakli joyda bo‘ladi va biz, oddiy insonlar, ko‘ra olmaydigan narsalarni ko‘radi. Bu haqiqatan ham hayratlanarli.
Marushich va Rovellaga kelsak, ular allaqachon jamoa bilan mashg‘ulotlarda qatnashishdi. Ammo maydonga qachon tushirish bo‘yicha qarorni ular tayyor holatga qaytganidan keyin ham men qabul qilaman.
Bizga barcha futbolchilar kerak. Bugun tarkibda kichik rotasiya amalga oshirdik va Diogu Leyte markaziy himoyada o‘ynadi. Ammo mashg‘ulotlarda hammaning qanday ishlayotganini hisobga olsak, har bir futbolchi o‘yin vaqtiga loyiq", — dedi Gattuzo.
