O‘zbekiston Superligasining 26-turi doirasida 30 oktyabr kuni uchta uchrashuv bo‘lib o‘tdi. Ulardan birida mehmonlar g‘alaba qozongan bo‘lsa, qolgan ikkita bahs durang bilan yakunlandi.

Kunning markaziy uchrashuvida Toshkentning «Paxtakor» klubi safarda «Xorazm»ni 1:0 hisobida mag‘lub etdi. Ushbu g‘alaba orqali «sherlar» ochkolari sonini 56 taga yetkazib, chempionlik uchun kurashda muhim uch ochkoni qo‘lga kiritdi.

Ayni paytda Farg‘onaning «Neftchi» klubi 58 ochko bilan turnir jadvalida peshqadamlik qilmoqda. «Paxtakor» esa 56 ochko bilan ikkinchi o‘rinda bormoqda. Biroq farg‘onaliklar raqibiga nisbatan bitta kam o‘yin o‘tkazgan.

Qo‘qonda mahalliy «Qo‘qon-1912» va «Qizilqum» jamoalari o‘rtasidagi bahsda hisob ochilmadi — 0:0. Mazkur natijadan so‘ng navoiyliklar 35 ochko bilan sakkizinchi, qo‘qonliklar esa 24 ochko bilan 14-o‘rinda qoldi.

Zominda bo‘lib o‘tgan «So‘g‘diyona» – «Buxoro» uchrashuvi esa 1:1 hisobida yakunlandi. Ushbu durang «Buxoro»ga ochkolari sonini 42 taga yetkazib, turnir jadvalida to‘rtinchi o‘ringa ko‘tarilish imkonini berdi. «So‘g‘diyona» esa 30 ochko bilan 11-pog‘onada bormoqda.

Superliga. 26-tur

30 oktyabr, juma

«Qo‘qon-1912» – «Qizilqum» – 0:0

«So‘g‘diyona» – «Buxoro» – 1:1

«Xorazm» – «Paxtakor» – 0:1

31 oktyabr, shanba

17:00. «Surxon» – «Nasaf»

17:00. «Mash’al» – «Dinamo»

19:00. «Navbahor» – «Andijon»

1 noyabr, yakshanba

16:00. «Lokomotiv» – OKMK

14 noyabr, shanba

«Neftchi» – «Bunyodkor»

Shu tariqa, 26-turning ilk o‘yinlaridan keyin chempionlik poygasidagi raqobat yanada keskinlashdi. Navbatdagi uchrashuvlar 31 oktyabr va 1 noyabr kunlari bo‘lib o‘tadi.