"Barselona"ning sobiq yarim himoyachisi va murabbiyi Xavi Lionel Messi hamda Krishtianu Ronaldu o‘rtasidagi raqobat haqida fikr bildirib, nima uchun argentinalik futbolchini tarixdagi eng yaxshi deb hisoblashini tushuntirdi.
"Messi — tarixdagi eng yaxshi futbolchi. Krishtianu esa tarixdagi buyuk futbolchilardan biri, yuqori saviyadagi to‘purar. Ammo Leo o‘yinni chuqurroq tushunardi: u tayanch yarim himoyachi, markaziy yarim himoyachi yoki soxta to‘qqizinchi raqam pozisiyalarida o‘ynay olardi, maydondagi bo‘sh hududlarni boshqalardan yaxshiroq anglardi".
Shu bilan birga, Xavi aynan Ronaldu Messining eng yuqori cho‘qqiga chiqishiga yordam berganiga ishonadi.
"Krishtianu uni yanada yaxshiroq bo‘lishga undadi. Ehtimol, Krishtianu ham, Leo ham buni tan olmas, ammo ishonchim komilki, ular bir-birini kuzatib borishgan. Agar sen raqobatchi bo‘lsang, eng yaxshi bo‘lishni xohlaysan".
Xavining fikricha, aynan shu raqobat har ikki futbolchining rivojlanishiga turtki bo‘lgan.
