«Andijon» bosh murabbiyi Islom Ahmedov Superliganing 26-turida «Navbahor»dan uchralgan mag‘lubiyatni (0:1) sharhladi.
«Avvalo, uzoq yo‘l bosib kelib, bizni oxirigacha qo‘llab-quvvatlagan muxlislarimizdan uzr so‘rayman. Birinchi bo‘limda tashabbusni raqibga berib qo‘ydik. Ikkinchi taymda esa ancha faollashdik, hujumlar uyushtirdik, ammo omad yetishmadi», — dedi Ahmedov.
Mutaxassis jamoadagi kadrlar muammosiga ham to‘xtaldi.
«Birinchi davradan keyin kerakli futbolchilarni jalb qila olmadik. Tig‘iz taqvim sabab jarohatlar ko‘paydi. Shuning uchun ayrim o‘yinchilarni o‘zlariga noodatiy pozisiyalarda o‘ynatishga majburmiz.
Aziz Turg‘unboyevni ham shu sabab himoyaga o‘tkazdik. Ashortiya va Islom To‘xtaxo‘jayev jarohatlangan. Dragan Cheran esa jamoaga yordam bera olmayotganini hisobga olib, o‘zaro kelishuv asosida o‘z xohishi bilan ketdi».
Ahmedov turnir jadvalidagi murakkab vaziyatga qaramay, jamoasiga ishonayotganini ta’kidladi.
«Yigitlar oxirigacha kurashyapti. Vaziyatlar yaratyapmiz, faqat ulardan foydalana olmayapmiz. Ishonaman, futbolchilar ruhiy va jismoniy jihatdan tiklanib, bu qiyin vaziyatdan chiqib ketishadi», — dedi «Andijon» ustozi.
