Xitoy davlat telekanali CCTV "Real" hujumchisi Kilian Mbappe atrofidagi mojarodan keyin Ispaniya chempionati o‘yinlari translyasiyalarini haligacha qayta tiklamadi. Cheklovlar dushanba kunidan buyon amal qilmoqda.
Eslatib o‘tamiz, mojaro fransuz hujumchisi bergan intervyuda Xitoyning sobiq rahbari Mao Szedunni diktator deb ataganidan keyin kelib chiqqan edi.
Ispaniyaning Marca gazetasi ma’lumotlariga ko‘ra, so‘nggi kunlarda CCTV telekanali efirida La Liganing birorta ham uchrashuvi namoyish etilmagan. Shu bilan birga, Xitoyda La Liganing eksklyuziv hamkori hisoblangan Migu raqamli platformasi barcha o‘yinlarni, "qaymoqranglilar" ishtirokidagi bahslardan tashqari, namoyish etdi va kelgusida ham ko‘rsatishni rejalashtirmoqda.
Mbappe va "Real"ning uzr so‘raganiga qaramay, CCTV efirida o‘yinlar translyasiyasi qachon qayta tiklanishi hozircha noma’lum. Telekanal va Xitoy Tashqi ishlar vazirligi bu masala bo‘yicha aniq javob bermayapti.
